Sri Chakra Makimai

இந்து சமயச் சித்தாந்தங்களின்படி கலியுகமானது அழிவின் யுகம். கலியுகத்தின் காலம் மொத்தம் 4,32,000 ஆண்டுகள் ஆகும். தற்போது நடந்து வருவது 5120வது வருடமாகும். ஆயினும் அழிவின் தொடக்கம் இதுவெண உணரலாம். உண்மை, நேர்மை, சமதர்மம் மறைந்து பொய்மையும், போர்களும் இயற்கைப் பேரழிவுகளும், உலகைச் சுட்டெரித்து வரும் வெப்பமயச் சூழலில், இயற்கையே வடிவான அம்பிகையைக் குளிரச் செய்யும் ஆற்றல் ஸ்ரீ சக்ர வழிபாட்டில் மறைந்துள்ளது என்பது பிரம்ம ரகசியம். அச்சுறுத்தும் பாம்பு முதல் அயரவைக்கும் அம்மை நோய் வரை அனைத்தையும் அம்பிகையாகப் பார்ப்பது நம் சமய மரபு. பிணியாக வருபவளும் அவள்தான். பிணிக்கு மருந்தாக வருபவளும் அவள்தான், அவளை வழிபட்டாலே துன்பம் யாவும் தீரும் என்பதில் சந்தேகமில்லை.

அம்பிகை வழிபாட்டில் சமயபேதம் இல்லை. “நிர்பேதா” – பேதங்களுக்கெல்லாம் அப்பாற்பட்டவள் அவள். எனவே ஸ்ரீ சக்ரம் விநாயகர் கோவில், முருகன் கோவில், சிவன் கோவில், விஷ்ணு கோவில், அம்மன் கோவில், ஐயப்பன், ஆஞ்சநேயர் கோவில்கள் என எல்லா ஆலயங்களிலும் பிரதிஷ்டை செய்யப்பட வேண்டும். அம்பிகையே தாய் வடிவான பெண் என்பதால் இல்லங்களிலும் ஸ்ரீ சக்ரம் வைத்து, பெண்களே ஸ்ரீ சக்ர வழிபாடு செய்யலாம். ஸ்ரீ சக்ர வழிபாட்டிற்கு பெண்களுக்குதான் முழுத்தகுதியும் உண்டு. விலக்க வேண்டிய நாட்கள் தவிர பிற நாட்களில் பெண்கள் ஸ்ரீ சக்ரவழிபாட்டைச் செய்யலாம். அலுவலகங்கள், வியாபார ஸ்தலங்கள். தொழிற்சாலைகள், கல்வி நிறுவனங்கள், அறிவியல் ஆய்வுக்கூடங்கள் போன்று எங்கும் ஸ்ரீ சக்ரம் பிரதிஷ்டை செய்து வழிபட்டால் ஒற்றுமையும், அமைதியும், சகல செல்வங்களும் முக்கியமாக ஆபத்துக்களிலிருந்து பாதுகாப்பும் ஏற்படும். ஸ்ரீ சக்ர வழிபாட்டிற்கு குரு உபதேசமும், ஸ்ரீ வித்யா மூலமந்திர உபதேசமும் அவசியம் தேவை. முறையாக அவற்றைப் பெற்று வழிபட்டால் எல்லா நன்மைகளும் உண்டாகும். வாசனை மிகுந்த மலர்களாலேயே ஸ்ரீ சக்ரத்தை அர்ச்சிக்க வேண்டும்.

ஸ்ரீ சக்ர மஹாமேரு வழிபாட்டிற்கு நூற்றியெட்டு மந்திரங்கள் அடங்கிய அஷ்டோத்திரமும், நூற்றியென்பது மந்திரங்கள் கொண்ட கட்கமாலா ஸ்தோத்திரமும், முன்னூறு மந்திரங்கள் கொண்ட லலிதா திரிசதியும், ஆயிரம் நாமாவளிகள் கொண்ட லலிதா சஹஸ்ரநாமமும், இவற்றிற்கெல்லாம் ஆதாரமாகிய பஞ்சதசாக்ஷ்ரி, ஷோடசி போன்ற ஸ்ரீ வித்யா மூலமந்திரங்களும் குரு முகமாக அறிந்து உபதேசம் பெற்றுக் கொள்வது சாலச்சிறந்தது. சௌந்தர்யலஹரியும் இவ்வழிபாட்டில் முக்கிய இடம் வகிக்கும். இவையாவும் வடமொழியில் உள்ளன. தமிழில் திருமந்திரம் மற்றும் அபிராமி அந்தாதி ஆகியவற்றில் ஸ்ரீ வித்தை பற்றியும், ஸ்ரீ சக்ரம் பற்றியும் குறிப்புகள் உள்ளன. நூற்றியெட்டு அர்ச்சனை மற்றும் அன்னைக்கு ஆயிரம் போற்றி எனும் ஸ்ரீ லலிதா சஹஸ்ரநாம தமிழ் மொழி பெயர்ப்பு நூல்கள் யாவரும் செய்யக்கூடிய எளிய வழிபாட்டிற்கு மிகவும் துணை புரிகின்றன, நவாவரண பூஜை என்று ஒன்று உண்டு. அனுபவமும், ஞானமும் உடைய வைதீகர்களின் உதவியுடன் அதனை இல்லங்களிலும் ஆலயங்களிலும் நிகழ்த்தலாம்.

ஸ்ரீ சக்ரம் என்பது இருபரிமாண வடிவமாகும். சதுரமான தகட்டில் அது அமைக்கப்படுவதால் நீளம், அகலம் என்ற இருபரிமாணங்கள் மட்டுமே உண்டு. அதனையே நீளம், அகலம், உயரம் என்ற முப்பரிமானத்தில் அமைப்போமானால் அது ஸ்ரீ மஹாமேரு என்று அழைக்கப்படும். அம்பிகை வழிபாட்டில் உருவ வழிபாடு நான்கு பரிமாணங்கள் உடையது. அதில் நீளம், அகலம், உயரம் என்ற முப்பரிமாணங்களுடன் தேவியின் அழகுத்திருக்கோலமும் ஒரு பரிமாணமாகும். ஸ்ரீ மஹாமேரு முப்பரிமாணம் கொண்டது, ஸ்ரீ சக்ர வழிபாட்டில் இரு பரிமாணம் மட்டுமே. ஸ்ரீ ஆகர்ஷண வித்யா தியானத்தில் அனைத்துப் பரிமாணங்களும் ஒருமித்தும், பின்பு பரிமாணங்களுக்கப்பால் கடந்த நிலையில் சங்கமித்தும் மெய்யுணர்வு பெறுகிறோம்.

ஐந்து கரத்தனை யானை முகத்தனை
இந்தின் இளம்பிறை போலும் எயிற்றனை
நந்திமகன்றனை ஞானக் கொழுந்தினைப்
புந்தியில் வைத்து அடி போற்றுகின்றேனே.

தெளிவு குருவின் திருமேனி காண்டல்
தெளிவு குருவின் திருநாமம் செப்பல்
தெளிவு குருவின் திருவார்த்தை கேட்டல்
தெளிவு குருவுரு சிந்தித்தல் தானே.

குங்குமத்தாலோ, குறிப்பிட்ட மலர்களாலோ இனிவரும் அர்ச்சனைகளைச் செய்யலாம்.

மூன்று லோகங்களையும் மயக்கும் சக்தி வாய்ந்த த்ரைலோக்ய மோகனச் சக்ரத்தின் அதிதேவதையாகிய திரிபுரா தேவிக்கும், ப்ரகடயோகினி சக்திகளுக்கும் பரிவார தேவதைகளுக்கும் இந்த மலர் அர்ச்சனையை மகிழ்வோடு சமர்ப்பிக்கிறேன்.

எல்லா விருப்பங்களையும் நிறைவேற்றி வைக்கும் சக்தி வாய்ந்த சர்வாசா பரிபூரகச் சக்ரத்தின் அதிதேவதையாகிய திரிபுரேசிக்கும், குப்த யோகினிகளுக்கும், பரிகார தேவதைகளுக்கும் இந்த மலர் அர்ச்சனையை மகிழ்வோடு சமர்பிக்கிறேன்.

அனைத்தையும் ஓய்வின்றி இயங்க வைக்கும் சர்வசம்ஷோபண சக்ரத்தின் அதிதேவதையாகிய திரிபுர சுந்தரி தேவிக்கும், குப்ததர யோகினி சக்திகளுக்கும், சகல பரிவார தேவதைகளுக்கும் மகிழ்வோடு இந்த மலர் அர்ச்சனையை சமர்பிக்கிறேன்.

எல்லாவிதமான சௌபாக்யங்களையும் நல்கும் சர்வ சௌபாக்யதாயகச் சக்ரத்தின் அதிதேவதையான திரிபுராவாசினிக்கும், சம்ப்ரதாய யோகினி சக்திகளுக்கும், பரிவார தேவதைகளுக்கும் இந்த மலர் அர்ச்சனையை மகிழ்வோடு சமர்ப்பிக்கிறேன்.

அனைத்து காரியங்களையும் சாதகமாக நிறைவேற்றியருளும் சர்வார்த்த சாதகச் சக்ரத்தின் அதிதேவதையாகிய திரிபுரா தேவிக்கும், குலோதீர்ண யோகினி சக்திகளுக்கும், பரிவார தேவதைகளுக்கும் இந்த மலர் அர்ச்சனையை மகிழ்வோடு சமர்பிக்கிறேன்.

அனைத்து ஆபத்துக்களிலிருந்தும் காப்பாற்றும் சர்வ ரக்ஷாகரச் சக்ரத்தின் அதிதேவதையான திரிபுரா மாலினீ தேவிக்கும், நிகர்ப்ப யோகினி சக்திகளுக்கும், பரிவார தேவதைகளுக்கும் இந்த மலர் அர்ச்சனையை சமர்ப்பிக்கிறேன்.

எல்லாநோய் நொடிகளையும் நீக்கியருளும், சர்வ ரோகஹரச் சக்ரத்தின் அதிதேவதையாகிய திரிபுர சித்தா தேவிக்கும், ரகஸ்ய யோகினி சக்திகளுக்கும், பரிவார தேவதைகளுக்கும் இந்த மலர் அர்ச்சனையை சமர்ப்பிக்கிறேன்.

எல்லா சக்திகளும் கைவரப் பெறச் செய்யும் சர்வ சித்திப்ரத சக்ரத்தின் அதிதேவதையாகிய திரிபுராம்பா தேவிக்கும், அதிரகஸ்ய யோகினி சக்திகளுக்கும், பரிவார தேவதைகளுக்கும் இந்த மலர் அர்ச்சனையை மகிழ்வோடு சமர்ப்பிக்கிறேன்.

உலகவாழ்வின் துன்பங்களையெல்லாம் நீக்கி பேரன்பு, பேரறிவு, பேராற்றல் யாவும் தந்து ஞான ஒளியில் என் ஆன்மாவைப் பிரகாசிக்கச் செய்யும் ஸ்ரீ மஹா திரிபுரசுந்தரி தேவியாகிய, சிவசக்தி இணைந்த வடிவாகிய லலிதாம்பிகை அன்னையின் திருவடிகளுக்கும், பராபராதி ரகஸ்ய யோகினி சக்திகளுக்கும், பரிவார தேவதைகளுக்கும் மகிழ்வுடன் இந்த அர்ச்சனையை சமர்ப்பிக்கிறேன்.

தூபம், தீபம் காட்டி நைவேத்யம் படைத்து கற்பூர ஆரத்தியுடன் பூஜையை நிறைவு செய்யலாம்.

ஸ்ரீ சக்ர பூஜை செய்யும் சுமங்கலிகள் மற்ற பெண்களுக்கு மஞ்சள், குங்குமம், வெற்றிலை, பாக்கு, பழம், பூச்சரம், மஞ்சள் கயிறு, வளையல், இரவிக்கை துணி ஆகிய மங்கலப் பொருட்களை வழங்கி அவர்களின் நல்வாழ்த்துக்களைப் பெற்றுக் கொள்வது அவசியம். கணவன், மனைவி, குழந்தைகளுடன் இவ்வழிபாட்டினைச் செய்வது மிகவும் நல்லது.

ஸ்ரீ சக்ரம் உலக சமாதானம் மற்றும் ஒற்றுமையின் சின்னம் ஆகும். எனவே அகில உலகமும் அமைதியுடனும், ஒற்றுமையுடனும், எல்லா நலன்களுடனும் வாழ வேண்டும் என்ற பொதுப் பிரார்த்தனையையும் செய்வது சிறப்பு.

ஸ்ரீ சக்ரம் பிரதிஷ்டை செய்யப்பட்டுள்ள திருக்கோவில்கள் தமிழகத்திலும், பாரதத்திலும் பற்பல உள்ளன. அவற்றுள் காஞ்சி காமாட்சி, திருவானைக் கோவில் அகிலாண்டேஸ்வரி, திருவொற்றியூர், தாய் மூகாம்பிகை ஆகிய புண்ணியத் ஸ்தலங்கள் மிகவும் புகழ்பெற்றவை. இத்தலங்களில் ஆதிசங்கரர் தன் திருக்கரங்களால் சக்தியூட்டி ஸ்ரீ சக்ரங்களைப் பிரதிஷ்டை செய்துள்ளார். அகிலாண்டேஸ்வரி அம்பிகையின் காதுகளை அலங்கரிக்கும் ஸ்ரீ சக்ர ஆபரணத்தில் ஒளிரும் தெய்வீக கிரணங்கள் பக்தர் தம் குறை தீர்க்கும் ஆற்றல் மிக்கவையாக இன்றளவும் உள்ளன.

பதினெட்டாம் நூற்றாண்டின் பிற்பகுதியில் மகாராஷ்டிரா மாநிலத்தில் பிறந்து தஞ்சையில் வந்து வாழ்ந்த மகான் ஸ்ரீ பாசுரானந்த நாதர் எனும் பாஸ்கரராயர். அவர் வாழ்ந்த திருத்தலம் இன்றும் தஞ்சை மாவட்டத்தில் பாஸ்கரராஜபுரம் என்ற பெயரில் பிரபலமாக உள்ளது. இங்கு பாஸ்கரராயரால் ஸ்தாபிக்கப்பட்ட மஹாமேரு உள்ளது. ஸ்ரீ வித்யா உபாசனை, தியானம் ஆகியவற்றில் ஈடுபாடு உடையவர்கள் அவசியம் சென்று தரிசிக்க வேண்டிய திருத்தலம் இது.

ஸ்ரீ ராஜகாளியம்மன் திருக்கோவில் திண்டுக்கல் மதுரை சாலையில், கன்னிவாடி எனும் ஊரின் அருகில் அமைந்துள்ளது. பதினெட்டுச் சித்தர்களின் ஒருவரான போகர் தவம் செய்த திருத்தலம் இது. ஆடிப்பதினெட்டு அன்று சிறப்பு விழா நிகழும் இத்திருத்தலத்தில் ஸ்ரீ சக்ரம் பிரதிஷ்டை செய்யப்பட்டுள்ளது.

தவக்கோலத்தில் நிற்கும் அன்னை காமாட்சி பஞ்சாக்கினி தவம் செய்த திருத்தலம் இது. சிவபெருமானின் கண்களை ஒரு முறை பார்வதி தேவி விளையாட்டாக மூடிவிட பிரபஞ்சமே இருளில் மூழ்குகின்றது. சிவபெருமானின் ஆணைக்கிணங்க தேவியானவள் மாங்காடு தலத்தில் நான்கு திசைகளுக்கும் நான்கு அக்கினிகளை வளர்த்தி, ஐந்தாவதாக அவற்றின் நடுவில் ஓர் அக்கினியை ஏற்படுத்தி அதில் தன் இடது காலை ஊன்றி, வலது காலை மடித்து இடக்கையை உயர்த்தி ஜெபமாலை உருட்டி கடுந்தவம் புரிகின்றாள். பிறகு சிவபெருமான் காட்சி தந்து காஞ்சிபுரத்தில் அன்னையைத் தன்னோடு ஐக்கியப்படுத்திக் கொள்கின்றார்.

அன்னை அங்கிருந்து அகன்றும் தணியாமல் எரிகின்றது பஞ்சாக்கினி. நீண்ட காலம் அவ்வெப்பம் தனியாமல் சுட்டெரிக்க மக்கள் யாவரும் துயரில் ஆழ்கின்றனர். ஆதிசங்கரபகவத் பாதாள் இங்கு விஜயம் செய்து “ஸ்ரீ அர்த்தமேருச் சக்ரம்” என்ற ஸ்ரீ சக்ரத்தை பிரதிஷ்டை செய்விக்க வெப்பம் தணிந்து குளிர்ச்சி நிலவிற்று. இங்கு உள்ள ஸ்ரீ சக்ரம் உலகிலேயே உள்ள ஒரே ஒரு அரியவகைச் சக்ரம் ஆகும். இன்று உலகளவில் பேசப்படும் விஷயம் “வெப்பமயமாதல்” எனும் இயற்கைச் சீர்குலைவு ஆகும். அதற்கான மாற்று வழிகளை விஞ்ஞானிகள் பலவாறாக ஆராய்ந்து வருகின்றனர். ஸ்ரீ சக்ர, மஹாமேரு வழிபாடு ஆன்மீகம் உலகினுக்கு ஈந்துள்ள வெப்பமயமாதல் பிரச்சனையின் தீர்வுக்கான சிறந்த வழிபாடு எனலாம்.

ஆந்திராவில் கிருஷ்ணா நதிதீரத்தில் கனகதுர்கா ஆலயம் அமைந்துள்ளது. இங்குள்ள தேவி சுயம்பு வடிவம் ஆகும். ஸ்ரீ ஆதிசங்கரர் பிரதிஷ்டை செய்த ஸ்ரீ சக்ரம் இன்றும் இங்கு வழிபடப்பட்டு வருகிறது.

பிரம்ம ரகசியங்களாகிய தத்துவங்களை நம் ஞானியர் உள்முகமாக்கி, வெளிமுகமான புறவழிபாடுகளை எல்லாத் தரப்பு மக்களும் செய்துணர வழி செய்த பெருமை என்னென்று உரைப்பது. வியந்து போற்றவே தோன்றும் மெய்ஞான மரபுகள் பல. அவற்றுள் ஒன்றுதான் ஜோதிஸ்தலமாக விளங்கும் திருவண்ணாமலை. இங்கு பள்ளியறை பூஜையில் பார்வதியுடன் பவனி வரும் சிவஸ்வரூபம் சிவமேரு என்றழைக்கப்படும் அதிசயமாகும். பொதுவாக மேரு என்றாலே அது சக்தியை மட்டுமே குறிக்கும். ஆனால், இங்கோ சிவமேரு என்று அழைக்கப்படும் உட்பொருள் பக்தியில் மூழ்கி உய்த்துணர வேண்டிய ஒன்றாகும்.

கோவை மாவட்டம் ஆனைமலை அருகே அமைந்துள்ளது மாசானி அம்மன் திருக்கோவில். மாசானம் எனும் மயானத்தில் படுத்த கோலத்தில் இருக்கின்றாள் அன்னை. உக்கிரமான இத் திருத்தலம் உலகில் அதர்மத்தை அழித்து தர்மத்தை நிலைநாட்ட, அன்னை கொண்ட கோலமாகும். அன்னையின் உக்கிரம் தணிக்க நெற்றியில் ஒரு ஸ்ரீ சக்ரம் ஸ்தாபிக்கப்பட்டு வழிபாடு செய்யப்படுவது வியப்புத் தரும் உண்மையாகும்.

பண்ருட்டி, கண்டிகை கிராமத்தில் அமைந்துள்ள ஸ்ரீ நகரத்தில், ஸ்ரீ மஹாமேரு பிரதிஷ்டை செய்யப்பட்டு ஸ்ரீ லலிதா மஹா திரிபுரசுந்தரி மேருவடிவில் வழிபடப்படுகின்றாள். இங்கு நித்யா தேவியர்க்கும், வாராஹி மற்றம் மாதங்கி தேவியர்க்கு உரிய சக்ரங்களும் அமைக்கப் பெற்று பூஜிக்கப்படுகின்றன. பௌர்ணமி அன்று சிறப்பு வழிபாடுகள் நிகழ்கின்றன.

கோவையில் ஆனைகட்டி மலையடிவாரத்தில் பெரிய தடாகம் என்னும் ஊரில் ஸ்ரீ லலிதாம்பிகை பீடம் அமைந்துள்ளது. இங்கு ஸ்ரீ லலிதாம்பிகை அன்னையே விக்ரஹ வடிவிலும், மஹாமேரு வடிவிலும், ஸ்ரீ சக்ர வடிவிலும் வழிபடப்படுகின்றாள். ஸ்ரீ வித்தை நெறியில் சமயாச்சாரம் எனும் மார்க்கத்தின் அடிப்படை தியான முறைக்கு இங்கு அதிக முக்கியத்துவம் தரப்படுவது குறிப்பிடத்தக்கதாகும்.

நிமிஷாம்பா கோவில் காவேரி நதிக்கரையில் ஸ்ரீ ரங்கப்பட்டினத்திலிருந்து 2 கி.மீ. தூரத்திலும், மைசூரில் இருந்து 17 கி.மீ. தொலைவிலும் அமைந்துள்ளது.  இத்திருக்கோவில் 400 ஆண்டுகள் பழமை வாய்ந்தது. இதனை எடுப்பித்தவர் மும்மடி கிருஷ்ணராஜ உடையார் எனும் மைசூர் மன்னர். அம்பாளின் திருநாமம் நிமிஷாம்பா என்பதாகும். வேண்டும் பக்தர்களின் வேண்டுதலை நிமிஷ நேரத்தில் நிறைவேற்றி வைப்பவளாதலின் இத்திருநாமம். இத்திருக்கோவிலில் கல்லினால் வடிவமைக்கப்பட்ட மகிமை வாய்ந்த ஸ்ரீ சக்ரம் அமைந்துள்ளது சிறப்பாகும். நிமிஷ நேரத்தில் அம்பிகை அருள்பாவிக்கும் மகிமையும், ஸ்ரீ சக்ரத்தின் பேராற்றலும் இத்திருக்கோவிலின் பெருமைக்கு காரணங்கள் ஆகும்.

தமிழகத்தில் சாந்தானந்த சுவாமிகள் அமைத்த ஸ்கந்தாஸ்ரமம், புதுக்கோட்டை புவனேஸ்வரி அதிஷ்டானம் ஆகியனவும், திருஈங்கோய் மலை அடிவாரத்தில் அமைந்துள்ள ஸ்ரீலலிதா மகிளா சமாஜ் தியான நிலையமும், ஸ்ரீ சக்ர மஹாமேரு வழிபாட்டில் முக்கிய இடம் பெறும் திருமடங்களாகும். நெரூரில் உள்ள சதாசிவபிரம்மேந்திரா அதிஷ்டானத்திலும் ஸ்ரீ மஹாமேரு அமைந்துள்ளது குறிப்பிடதக்கது.